Levo tempo sen escribir, pero non podía deixar pasar este día sen adicar unhas verbas ao noso homenaxeado deste ano: Manuel Lugrís Freire. Ainda que o adicar un día como este á literatura do país teña o desconcerto de atopar as librarías pechadas, sempre nos queda a celebración persoal. E isto ven de cada un, xa que por moito que os xornais, a televisión ou os mestres da escola nos conciencien de que cómpre manter viva a lingua galega, sen a predisposición de cada un de nós non facemos nada. Non é que os que falan castelán comezen a falar galego a partires de mañá, pero sí que o inclúan nas súas conversacións, ainda de forma esporádica, sen vergoña, ou pensamento de facer o ridículo. Todo é comezar.
Déixovos uns versos deste escritor de contos, poesía e obras teatrais, nado en Sada, emigrado a Cuba e de volta a Coruña para levantar e defender a cultura galega.

¡Amor da terra! sempre vivirás firme e forte
No meu peito namentras que non me leve a morte;
Meu único luceiro que nas noites de dôr
Quencerás o meu corpo con lóstregos d'amor.

Roseira milagrosa do meu querer profundo,
Que enche côs seus arumes os ámbitos do mundo.
Nasce en nidias arelas como o primeiro amor;
E unha ardencia sin lume, ê un recendo sin fror.

El mantén a esperanza do galego exiliado;
El ê a fonte de bágoas que lavan o pecado;
Salvando as nosas almas él nos fai retornar
A cumprir coas obrigas do noso santolar.

¡Amor da terra! sempre vivirás firme e forte;
Mentras a Celtia viva non termeral-a morte!